التوليف ونظام التكليف

بقلم-د محمود عبد المجيد
التوليف ده تعبير يعرفه اللى غاويين تربية الحمام ..وهو عبارة عن تزويج دكر ونتاية لبعض لأول مرة..
الحمام من الطيور المخلصة واللى دايما بيعيش الدكر والنتاية بدون علاقات اخرى خارج الزواج !! لغاية لما يموت احد الزوجين ..بعد كده ممكن يدور على وليف تانى ..
كنت باربى حمام وانا صغير وكنت باجمع الدكر والنتاية ( اللى مايعرفوش بعض قبل كده ) فى قفص مقفول واسيبهم كام يوم..
الدكر بيغازل النتاية وينفش ريشه ويلف حواليها ..ويبغبغ بصوت جميل ( هديل الحمام ) والنتاية بتعمل نفسها مش شايفاه وتلقط الدرة او تشرب وتلف فى القفص بدون اهتمام ..وبعدين يبتدى الدكر ينقر النتاية فى جناحها بمنقاره ..واحيانا يخبطها بجناحه ..وهى ممكن ترد عليه بالضرب بجناحها ..
ويفضلوا كده مش متفقين ..وفى الآخر تلاقيهم بياكلوا مع بعض وبيتفقوا مع بعض ..وبيولفوا على بعض .. وتشوفهم بيطيروا وماسكين قش فى مناقيرهم وبيحطوه فى قفصهم ..كنت اعرف ان النتاية حتبيض ..وفعلا تبيض على القش اللى اتجمع ..ويتبادل الدكر والنتاية احتضان البيض ..
وبعد 18 يوم يفقس البيض وتطلع زغاليل جميلة ..

وزارة الصحة ونقابة الأطباء هما دكر ونتاية الأطباء ..
عشان يطلع نظام جديد  لتكليف الأطباء ..لازم يقعدوا مع بعض فى قفص ..قصدى فى مكتب لشهور ويغازلوا بعض وينقروا بعض ويلفوا ورا بعض بشفافية وقدام الأطباء ..عشان يولفوا على بعض وفى الآخر يطلعوا لنا زغاليل ..قصدى نظام تكليف بعد التوليف ..
يكون أغلب الأطباء موافقين عليه ..