الصحفية الكبيرة ‘ص’ : ” باشكرك على سعة صدرك ”
أنا: دى شغلتى توسيع الصدر
ص: مش كل الدكاترة زيك ..
لكن أنا عذراهم عشان ظروف الكورونا ..
أنا: صحيح ضغط وباء الكورونا أثر علينا كلنا ..
ص: بس برضه قبل الكورونا فيه دكاترة كتير مابيسمعوش العيانين ومابيطولوش بالهم عليهم .. وخصوصا الدكاترة الكبار ..
أنا : كلنا ضحايا نظام صحى عقيم وفاشل ..كلنا بدون إستثناء ..
الدكاترة الكبار والصغيرين والتمريض والعاملين وطبعا العيانين ..
ص: مش فاهمة ؟
أنا: تقدرى تقوليلى إيه اللى يخلى أستاذ صدر كبير يكشف على حالة برد او نزلة شعبية بسيطة ..او أستاذ أنف وأذن كبير بيعمل عمليات إستئصال لوز أو غسيل أذن ؟؟!!!
أو أستاذ جراحة كبير يعمل عملية إستئصال زايدة ؟؟
ده اللى بيخلى الضغط عليه كبير والزحمة على عيادته والحجز قبل الكشف بشهور ..
وده بيخليه مايقدرش ياخد وقته فى الكشف وتحمل العيان والرد على أسئلته ..
وده برضه بيحصل فى المستشفيات العامة بسبب الزحمة ونقص عدد الأطباء وسوء الأحوال الإقتصادية اللى بتجبر الناس على اللجوء للمستشفيات العامة .
ص: وإيه اللى بيجبر الدكاترة الكبار على كده ؟مايحددوا عدد المرضى ؟!
أنا: حتى لو حدد عدد المرضى مش حايقدر يحدد نوع المرض وصعوبته قبل الكشف .. وحتى إجراء الجراحات مافيش قانون ينظم الحاجات دى .. بالإضافة طبعا لجشع بعض الأطباء اللى بيسمعوا عن أجور لعيبة الكورة والفنانين وحالة السعار والتنافس على أعلى دخل وأشهر طبيب ..
وكل ده مسؤولية الدولة ..أى دولة ..أولا وأخيرا ..
ص: طب والحل ؟
أنا : الحل طبعا فى نظام تأمين صحى شامل اللى لازم يضم أغلبية المرضى والأطباء بقانون ملزم ..نظام يطبق بسرعة ويدعم من ميزانية الدولة ( أولوية قبل الكبارى)..
ص: وده حايحل المشاكل إزاى ؟
أنا : المريض بيكشف الأول عند ممارس عام ..فإذا كانت حالته بسيطة حايكتبله العلاج اللازم..وإذا ماعرفش يشخصه يحوله للإخصائى فى حالته ..والإخصائى يعالجه ..وإذا ماعرفش يحوله للأستاذ الكبير فى مجال تخصصه ..
وطبعا ده يتطلب توسيع قاعدة الأطباء الممارسين والوحدات الصحية الأولية اللى حاتحول الحالات للمستشفيات العامةمن الصف الاول ثم المستشفيات النوعية زى الصدر والحميات والعيون وغيرها ..
كل ده فى تسلسل زمنى معقول وبعد رفع مرتبات الأطباء طبعا ..وكل الطاقم الطبى بتنفيذ اللى جه فى الدستور الحالى من تخصيص ٧%من الدخل القومى للصحة..هى بالمناسبة ( ٣% بس فى آخر موازنة ) .. وبكده يتفرغ الأساتذة الكبار للحالات الصعبة ويصبروا عليها وللأبحاث العلمية اللى بتطور الطب ..
ويتفك الإشتباك المزمن بين المرضى وبين العاملين فى المجال الصحى ..
د.محمود عبد المجيد اشتشارى امراض الصدر -مدير مستشفى صدر العباسية الاسبق
