“الديلر” فى المستشفيات الحكومية
بقلم-د.عبد الرحمن حماد:
قرأت خبر في احد الجرايد الأجنبية، عن استهداف تجار المخدرات لمراكز تأهيل المدمنين، وأنهم بيحاولوا يدخلوا مخدرات لهذه المراكز التي تقوم بعلاج المدمنين، الشكل اللي مشهور عندنا، ان الديلر او تاجر المخدرات بيحاول يدخل المستشفيات او مصحات علاج الادمان، مش عشان يتعالج من الادمان..! ولكن عشان يلم زباين..!
وعادة لما حد بيدخل منهم في المستشفيات؛ بنلاحظ عليه انه مش ملتزم بتعليمات العلاج، وبيتكلم كتير وعايز يتصاحب على زمايله..! وبيعمل مشاكل كتيرة، وبيتلكك عشان يخرج..!
فبمجرد ما يكون عرف يعمل شوية علاقات وياخد ارقام الناس،يفتعل اي مشكلة ويخرج..!!
الديلر اللي بيعمل دا بيكون عايز يوسع شبكة علاقاته، وممكن تكون الدنيا مريحة معاه برا،يروح عشان يلم زبائن..! وللاسف شفت كذا بنت بالشكل دا، وشفت واحدة تاجرة ..تاجرة فعلا..!
للاسف الظاهرة دي بتكون اكتر في المستشفيات الحكومية، لان العلاج شبه مجاني،
وكمان لان عادة الديلر جاي في شكل مدمن محتاج علاج ومساعدة..!!
فمحدش حيقدر يمنعه من طلب العلاج..!
الطبيب الشاطر اثناء الفحص يقدر ياخد باله من الاولاد دول، ويمنع دخولهم في أقسام العلاج، ولو اضطر يدخلهم محتاج يفتح عينيه عليهم ، هو والفريق اللي معاه، والتمريض يركز معاهم، ويتنبه عليهم مفيش كلام سلبي عن المخدرات، وفِي التزام بفقرات العلاج، والنَّاس جاية تتعالج، وأول ما نلاحظ انهم بداو يعملوا مشاكل ومفيش التزام، يتم خروجهم ضد النصح الطبي، ويدرجوا على قوائم منع الدخول..!
في حال تأكدنا من كدا..! ويتم تسجيل الواقعة في الملف الطبي للمريض..!
في المستشفيات الخاصة، اظن الوضع مختلف، فكلما كانت المستشفى أغلى، كانت في صعوبة ان الأشخاص دول يدخلوا اصلا..!
واعتقد المستشفيات الخاصة بتقدر تاخد بالها اكتر وأسرع، عشان اعداد المرضى قليلة طبعا.
طبعا دخول المخدرات لمصحات وأقسام علاج الادمان، ممكن يحصل بديلر او غير، يكفي تعرف موظف غير امين او ضعيف النفس، وتغريه بالمال، وبعضهم ممكن يروح يعرض خدماته..!
عشان كدا مهم قبل تعيين اي موظف في أقسام ومصحات علاج الادمان،عمل تحاليل مخدرات، وبشكل دوري وعشوائي وعند التوظيف،ويفضل في وظائف زي الأمن والتمريض اختيار ناس مش بتدخن اصلا..!!
الاغرب، ان ممكن الأهل يدخلوا لأولادهم مخدرات واولادهم داخليين يتعالجوا،
ودا شفته في المستشفيات الحكومية، الأهل معندهمش مانع ان ابنهم يدخل يتعالج من الهيروين او الترمادول وهما يدخلوا له حشيش؛ وفِي صباع المحشي كماااان..!
اه والله حصل.
