حكاية معجزة طبية في مستشفى الجمهورية التعليمى

كتب هشام الهلوتى
ماحدث فى مستشفى الجمهورية التعليمى معجزة طبية بكل المقاييس ،فقد عرضت حالة الطفلة صابرين وعمرها ثلاث ساعات فقط على مشروع رعايات مصر ومولودة بورم وزنه ضعف وزنها وتم توجيه الحالة إلى قسم جراحات الاطفال بمستشفى الجمهورية التعليمى.
و الحكاية يرويها الدكتور هاني الامبابي
استشاري جراحة الاطفال بهيئة المستشفيات والمعاهد التعليمية عبر صفحته  بالفيسبوك قائلا : أول ماشفت الحالة قلتلهم دى حالة الجمهورية التعليمي و وتواصلت مع الدكتورة بسنت صلاح استاذ مساعد رعاية الاطفال.
المهم كان فيه شويه قلق بسيط كده
اولها هنركب انبوبة ازاي
وهنركب خط مركزي وريدي إزاي
وهنعمل ايه شويه اسئلة كده؟

يقول الدكتور هانى الامبابى أول ما وصلنا الحضانة كنا مستغربين هنعمل ايه؟

تقريبا الورم اكبر من نص الطفلة نفسها
ربنا سهل الحال ودخلنا العمليات
الحاله ده اشتغلناها ليلة وقفة عرفات.

بدأنا نشتغل وانا رايح ومعايا حاجات عشان نعمل retrograde intubation
و بنجهز و اصلا مفيش حته ندخل منها
المهم ربنا سهل وركبت الانبوبة ود طارق حسام بيقول لى هنركبها ازاي
تركيب القسطرة المركزية خد وقت والحمد لله لقينا وريد في آخر الرقبة وربنا سهل.

تقريبا الورم ماسك في كل حاجه و كل حركة للورم بتحرك القصبة الهوائية و بتأثر علي الطفلة .
ثلاث مرات نوقف شغل و نظبط،
القلب توقف مرة داخل العمليات ورجع تاني .

 

 

ويواصل الدكتور هانى الامبابى الجراحة استغرقت ساعتين ونصف والحمد لله تمت بسلام خلصنا وانا كجراح وظيفتي احافظ علي أساسيات الحياة الهواء والدم وشويه الأعصاب .

الدكتور طارق حسام استشاري تخدير ورعاية مركزة وعلاج الم كان بيقول مش هتعرفوا تقفلوا الرقبة ده مفيش جلد !
المهم بفضل الله قفلناها وده اخد لوحده وقت مماثل لوقت العملية وقام بالمهمة الدكتور بيومي اخصائي جراحه الاطفال
وكل flap اللي في الدنيا اتعملت.

وخلصنا وطلعت الطفلة الحضانة
اتحطت علي تنفس صناعي شويه وتتشال والمشكلة الكبيرة ان القصبة الهوائية تحت الجلد مفيش حاجه تسندها خالص
كل ما تتشال من التنفس الصناعي ترجع تاني مفيش فايدة
لحد ما ربنا سهل شهر و ٢٠ يوم رحت امريكا وباطمئن عليها عرفت انها اتشالت من الفنت ومتحطتش تاني والحمد لله صابرين كويسه
و هتخرج ،طيب هاتوا الاهل ،
يادكتور الاهل من قنا و مجوش للطفلة اصلا الجد بس جه مرتين وخلاص
طيب كلموهم ٤ ايام نكلمهم
الام جت الام صغيرة وعندها ٣ بنات تانيين و متعرفش بنتها كان عندها ايه ومستغربة اننا فرحانين انها كويسه.

ويستكمل الدكتور هانى الامبابى عملنا حفلة وحضرها صديقي الدكتور مصطفي القاضي مدير المستشفى في وسط اسرة جراحة الاطفال ورعاية جراحة الاطفال و الحفلة عملتها الدكتورة بسنت صلاح اللي بتفرح لخروج الحالات كأنها بتفرح لتخرج الطفل.
المهم أعجبني تعليق الدكتور مصطفي القاضي لما بيقولي المكان فيه روح حلوة والناس بيحبوا بعض .
ويضيف الامبابى رعاية جراحة الاطفال ورعاية جراحة الاطفال المبتسرين في مستشفى الجمهورية صرح كبير ربنا يستر ويكمل علي خير .
انا عمري ما خفت علي خير عملته زمان عندما تركت جراحة الاطفال في ٢٠١٥ كنت حزين وكنت هموت من الحزن لأنى تركت المكان اللي عملته من الصفر وكل مشكلتي اني شاطر و بعرف اعمل اللي محدش بيعمله وبهدد وجود ناس تانيين من غير ما اعمل حاجه (اه والله من غير ما بعمل حاجه باشتغل بس )
الدكتور طارق حسام قالي كلمة ساعتها فضلت ترن في دماغي سنين وهي الاية القرآنية ( اما الزبد فيذهب جفاء واما ما ينفع الناس فيمكث في الأرض ) و قالي اللي بيحصل ده اختبار لصدق النية و لو نيتك سليمة جراحة الاطفال هتكمل و كملت ورجعت زميل مساعد و كملت و اخدت الدكتوراة و قصص وحوارات لو كتبت تملأ كتب مين تآمر ومين اشتكي و مين شهد زور ، بس الهدف واحد خدمة مريض غلبان محدش شايفه خدمة طبيب اغلب من الغلب مش هيتعلم الا في مكان زي ده و خرجنا ناس فاتحه اماكن وناس بقوا رؤساء اقسام و كله بفضل الله
خلاصة الامر
اشتغل لوجه الله تعالى
مش هتندم ان شاء الله

حالات جراحة الاطفال الصعبة بتنجح بفضل الله و بفضل فريق اطباء رعاية وحضانة و تمريض شايل اكتر من ٧٥% من المجهود و التعب و هما المسئولين عن المتابعه واحنا بناخد الشكر والفضل
اشكرهم ومش هنقول اسمائهم دول جنود مجهولين واشكروهم لانهم ابطال في المواجهة.