بقلم د شريف عبد الهادي
الجراحه من اول جراح أو جراحة العيون الرقيقة الرقيقه لحد جراح الاوعيه الدمويه اللى بيدور على الاورطى و يفتحه وبعدين يقفله و لحد جراح العظام اللي تشوفه بيشتغل بالمناشير و الشواكيش في العمليات
هذا الكائن الجراح اللى اغلب الناس العاديين او حتى الدكاتره اصحابه شايفينه شخص غتت و غامض او تِنِك او مغرور، و اللى الناس بتشوفه لابس نضاره شمس واخر شياكه وشخص قليل الكلام ومش كول من غير ما يعرفوا حاجه عن حياته،
او عن كمية المذاكره والتعب والشقى والليالى اللى نامها فى القسم بعد العمليات جنب العيانين على كرسى او ترولى، او البهدله اللى اتبهدلها فى الطوارئ ، او عن كمية العمليات اللى ساعد فيها او كمية العمليات اللى اتساعد فيها ، عشان يقدر يمسك مشرط لوحده ويفتح بيه جلد انسان ويشتغل جوا جسم ارقى من فى الوجود بنى ادم ، محدش يعرف حاجه عن كمية التركيز اللى مطلوبه منك يومياً ولا عن كمية الضغط العصبى اللى بيبقى الجراح عايش فيه قبل وجوا وبعد العمليه لحد ما العيان يخرج كويس من المستشفى ، عن كام مره بتروح بهدومك الداخليه عليها دم عشان الماكنتوش اتقطع وانت من تركيزك فى العمليه ملحقتش تغيره ، عن كام مره اتشكيت بابره او مشرط وانت شغال وما بتلحقش اصلا تزعل او تفكر فى انواع العدوى اللى ممكن تجيلك منه وبتفضل بكامل تركيزك و مشاعرك فى العمليه، عن كام بنى ادم ممكن تنقذ او تغير حياتهم للافضل باذن ربنا ، ما هو عادى او شكراً دا الطبيعى ، بس ييجى عيان واحد يحصل فيه أي مضاعفات من اللي ممكن يحصلوا بنسبة معينة في الجراحة
سواء لك او ملكش يد فيهابيخلى ايامك سودا وضميرك ينقح عليك لحد ما العيان يتحسن او تدخله العمليات تانى تصلح له المشكله ، العمليه اللى ممكن تكون تانى او تالت مره للعيان وكلها مشاكل وتشريح متغير والمساعد اللى ممكن يكون مش نايم كويس مهمل والممرضه اللى ممكن تكون خايبه او مهمله و الالات اللى ممكن متكونش على ما يرام ، كل دا فى وشَّك انت ، انت الجراح اللى عمل العمليه ومسؤول عنها بغض النظر عن التفاصيل ، اى بكتيريا تعمل عدوى فى الجرح وتبوظ العمليه وتنغص عليك عيشتك انت واسرتك ، اى لحظه عدم تركيز كامل فى العمليه ممكن ينتج عنها ايه ، كام مره كلت من غير نفس او معرفتش تنام بليل عشان عيان فيه مشكله ، كام مره سافرت او خرجت وانت مزاجك متكدر وقلبك ومشاعرك مع عيان لسه محجوز فى المستشفى وانت قلقان عليه، ممكن فى البدايه يكون الموضوع اعجاب ب برستيج الجراحه ومسكة المشرط ولبس بدلة العمليات والكلام ده ، لكن بعد فتره وفى نص الطريق بتكتشف انك اخترت اختيار صعب جداً وعليك مسؤليه رهيبه قدام نفسك تجاه انسان حط ثقته فيك وائتمنك على جسده ، وانك دفعت وهتفضل تدفع انت وكل حد قريب منك ثمن المسؤولية والأمانة دى من عمرك و راحتك واعصابك وصحتك..
