شو التامين الصحي

بقلم-محمود فؤاد:
التامين الصحي هو الحل ، التامين الصحي هو الامل ، التامين الصحي هو بدايه اعاده هيكله وبناء النظام الصحي في مصر كله من الالف للياء .
يعني نظام كامل للرعايه الصحيه تتبناه وتفتخر به الدوله اول ورشه عمل للقانون حضرتها كانت بدعوة من العزيز المرحوم سمير فياض 2007.
رحنا ورش عمل في مركز معلومات مجلس الوزراء وجلسات استماع في البرلمان ايام مبارك والاخوان وورش معهد التخطيط والمراكز البحثيه وغيره كان اهم ملامح العداله الاجتماعيه يلوح امامنا .
حلم والله حلو ،لو تعرفوا ان فيه مواطنين بيموتوا علشان ازازة دواء او شريط برشام او الناس اللي بتبيع حاجاتها علشان تتعالج او قدم عيل تتبتر علشان حقنه فاكتور .
كتبت كتير ان الدولة عظيمة انها اصدرت القانون وانه هيكتب للسيسي انه صدر في عصره وقلت عليه اضخم واهم قانون خلال 60 سنه .

ورغم مصايب التشغيل التجريبي في بورسعيد دافعت عن التجربه وانه لازم يحصل اخطاء وكده .
انتظرت لقاء الرئيس وسمعت الوزير محمد معيط وانا اتشرف بمعرفته من ايام عمله بالصحه وشوفت د مجدى يعقوب قاعم مش مبسوط لاني اعرف وجهه جيدا ؟
كلام الوزير كلام بيقول ان الحكومه بتتعامل مع القانون ذي قانون عداد التاكسى كده .كلام كارثي .كلام بيقول اننا مش نظام صحي اجتماعي امريكي او فرنسي او تركي ده نظام صحي للجبايه يعني الحكومه هتلم الفلوس والناس برضه هتدفع ؟
يعني الحكومه هتلم الفلوس والناس تبني المستشفيات من جيوبها وتقبض الاطباء والكل من جيبها ؟
كلام الوزير كله يؤكد ان مفيش قانون انما في شو ؟

ايه علاقه د مجدى بالقانون وماذا قدم للقانون وفي اى وقت حضر جلسه او ندوه او قعده عرب للقانون ؟
بس لو حضور د مجدى كطبيب عظيم له اسم وشهره بفضل حب المصريين اللذين هربوا من جحيم العلاج الحكومه له فهناك اطباء عظام في الاورام والقلب وغيره و اخرين لايقلون عنه وهم كثر ؟
احنا مش مهميين يكون عندنا فوبيا انه اول قانون واهم قانون وارفع قانون واطول قانون .
احنا عاوزين الناس تتعالج من اشتراكاتها اللي بتدفعها من جيبها مش شحاته او منة من حكومة لان محدش له فضل علي الشعب ؟
التفاصيل المتاحه لي ان تطبيق القانون في بورسعيد كارثي لاشيء تغير وسستمر هذا في المحافظات الاخرى ؟
يبدوا ان الحكومه لاتعرف للأن يعني ايه قانون تباهي به اوباما او ضرب في وش اليونان والبرتغال ؟
احنا محتاجين قانون للعدل الاجتماعي واعاده توزيع للثروه مش شو واغاني وبدل مستورده ؟
ياريت يكون كلامي غلط ويخيب ظني .

مدير المركز المصري للحق في الدواء