كيف تحسن الديمقراطية الحقيقية الصحة .. ووزارة الصحة ؟

بقلم- محمود عبد المجيد:

سألت نفسى كيف تحسن الديمقراطية الحقيقية الصحة .. ووزارة الصحة ؟

أول حاجة حاييجى مجلس نواب منتخب بيعبر عن الأغلبية المحتاجة وأولوياتها ..وحيلتزم بالدستور ..وبالنسبة اللى محددها للصحة 7 % من الدخل القومى ( الحد الأدنى طبقا للمعايير الدولية ) ..ومعروف ان النسبة الحالية 3% -4% ..داخل فيها طبعا المرتبات والصرف الصحى !!

تانى حاجة المجلس حيختار وزير صحة من الحزب اللى اخد الأغلبية واللى انتخبه الشعب على اساس برنامج للصحة ملتزم بيه وبالوزير اللى حاييجى بعده لو اتغير لأى سبب ..
وده حايعمل استقرار فى سياسات الصحة مهما اتغير الوزراء ..

وزير الصحة حايلتزم بسياسة الحزب وحايعمل حساب للى انتخبوا حزبه .

وزير الصحة حيعمل حساب للعاملين فى الوزارة لانهم يقدروا يشتكوه من غير مايخافوا من بطشه ..لان فيه اعلام حر وقضاء ناجز ومستقل .. (مش حايقدر مثلا يهددهم بالنقل لانهم ماراحوش دورة تدريبية بلغوهم بيها قبل 24 ساعة !!.).

الاهتمام بالصحة كأولوية حيخلى مستشفيات وزارة الصحة أكثر جذبا للمرضى وحيقلل تحكم المستشفيات الخاصة فى الناس وفى الأسعار ..

التأمين الصحى الشامل حتتوفر الميزانية الكافية ليه بسرعة لانها مش حتتصرف على بناء القصور  !!

المجالس المحلية المنتخبة حتراقب أداء المستشفيات الخاصة والعامة بدل المجالس الحالية غير المنتخبة اللى بتكتفى بالتوصية على مريض ولا تعيين قريب.. او ابتزاز مدير ..

الاطباء والعاملين فى قطاع الصحة حيحسوا بالعدل فى الاجور المتناسبة مع ظروف الدولة وعدم التمييز بين فئة واخرى ..والامن حايتفرغ لحمايتهم بدل حماية التشريفات ..وحاينعكس ده على تحسين الأداء والتعامل مع المرضى ..

المرضى حايحسوا بتحسن الخدمة وحيتأكدوا ان اى تقصير حايتم محاسبة المقصر عليه لان فيه قضاء عادل وناجز ..
ومش حايبقى فيه اعتداءات على الاطقم الطبية ..لان المريض مطمئن انه حاياخد حقه بالقانون مش بإيده ..

نقابة الأطباء حتبقى قوية بأطبائها اللى إنتخبوا أعضاءها بأغلبية كبيرة ..وحيسندوها لانهم مش خايفين وعارفين انها ممكن تساعدهم ..

باختصار الديمقراطية هى الحل .