إطفى سيجارتك و إدعيلى

بقلم-د.محمود عبد المجيد:

“إطفى سيجارتك و إدعيلى” ده نداء منى فى اليوم العالمى للسدة الرئوية ..يوم تذكير الناس بمرض “السدة الرئوية” أو.. الضيق الشعبى المزمن أو..الإلتهاب الشعبى المزمن أو .. النزلة الشعبية المزمنة أو .. حساسية الصدر عند الكبار ..

دى أسماء مختلفة لمرض واحد أعراضه هى..صعوبة التنفس والنهجان عند المجهود ..والكحة المزمنة ..
والبلغم اللى مابيخلصش .

وبعض العيانين بيتهموا الدكاترة إنهم مختلفين ومش عارفين هما عندهم إيه !!

لكن الحقيقة ان هو مرض واحد بأسماء مختلفة ..وسببه الرئيسى هو ..

التدخين ،سواء للسجاير أو .. الشيشة أو ..التدخين الإلكترونى أو ،الفيب أو ، السيجار أو ،البايب .

والسبب التانى هو تلوث الجو ..

والمرض ده تالت مرض بيسبب الوفاة من بين الأمراض المختلفة ..

طبعا بعد مابيسبب صعوبة الحركة بسبب النهجان ونقص الأوكسجين وزيادة ثانى أوكسيد الكربون فى الدم لحد مايسبب ..

الفشل التنفسى ..

ويحتاج العيان لجهاز تنفس صناعى فى الرعاية المركزة ،ويارجع يتنفس تانى يا مارجعش ..

والعيان لازم يتعالج باستمرار بموسعات الشعب الهوائية سواء برشام أو بخاخات والمضادات الحيوية وأحيانا يحتاج علاج نفسى وتأهيلى ..

وياريت ياخد تطعيم الأنفلونزا الموسمية كل سنة فى شهر اكتوبر من كل سنة فى العالم كله وفى أى وقت من السنة فى مصر بس !!( عشان لسه فى الجمرك بيتفحص !!)

وأهم حاجة واول حاجة وآخر حاجة ..

إطفى السيجارة فورا ..
وإقعد إدعيلى ..