انفلونزا الخنازير..الشفافية مطلوبة!

بقلم-د.محمود عبد المجيد
أنفلونزا الخنازير أو H1N1 اللى هى الأنفلونزا الموسمية السنوية واللى بيسببها السنة دى فيروس H1N1 أو H3N2 حسب وزير الصحة الأردنى اللى رصدت وزارته الأنفلونزا السنة دى وأعلن بكل شفافية إصابة حوالى 100 شخص ووفاة شخصين .. وقال ان شراسة الفيروس أقل بكتير من وباء 2010 ..

وأعراضها أنفلونزا الخنازير أو H1N1 اللى هى الأنفلونزا الموسمية  إرتفاع درجة الحرارة الى  38 درجة أو أكتر شوية ..مع التهاب بالحلق وآلام شديدة بالجسم وكحة ناشفة ومزعجة مابتخليش العيان ينام ..

والوقاية منها تكون وضع  منديل عند الكحة أو العطس ..وغسيل الإيدين بالميه والصابون وتطهير الأسطح والأكر والموبايلات والريموتات واستعمال الأدوات الشخصية زى الفوط والمعالق والكوبايات بكل واحد ..
والراحة فى البيت عشان ماننشرش العدوى وجزء من العلاج ..مع شرب السوايل الدافية ..

وتناول الأدوية اللى بتنزل الحرارة واللى بتهدى الكحة ومضادات الحساسية ..وأحيانا المضادات الحيوية ..

وده طبعا بعد إستشارة الطبيب المتخصص اللى هو ..
أنا وبس😂

وياريت كانت وزارة الصحة المصرية زى الأردنية فى ترصد الفيروس والإعلان عنه بكل شفافية وتوفير مصل الأنفلونزا فى شهر أكتوبر الماضى وتوفير عقار التاميفلو لبعض الحالات الشديدة ..

د.محمود عبد المجيد استاذ امراض الصدر ..مدير مستشفى صدر العباسية الاسبق