الدنيا برد..وخلى بالك من الورد

بقلم-د.محمود عبد المجيد:

أما الورد اللى بيسعد حياتنا ..فدول أولادنا ..اللى بينزلوا كل يوم الصبح لمدارسهم ..

ياريت نهوى بيوتنا تهوية خفيفة عشان نعرف الجو شكله إيه ونعادل درجة الحرارة فى البيت مع الجو الخارجى ..

وياسلام لو يفطر اولادنا شاى بلبن مع بقسماط ..

وقبل مايخرجوا لازم يشربوا شوية مية مش ساقعة ..عشان يعادلوا درجة حرارة اجسامهم مع درجة حرارة الجو الخارجى فما يحصلش انتقال سريع من درجة حرارة الجسم الدافية للجو الخارجى البارد ..لان ده لو حصل بيقلل مقاومة الطفل للإصابة بالبرد او التهابات الزور ..
كمان لازم اولادنا يلبسوا ملابس تدفيهم بس ..مش تخليهم يعرقوا ..لان الهوا البارد لما يواجه العرق حينشفه ودرجة حرارة الطفل حتنخفض بسرعة وده برضه يقلل مناعته ..
واكيد ولادنا بياخدوا سندوتشات من اللى بيحبوها ..عشان ياكلوها فى الفسحة ..

ولما ينزل تطعيم الانفلونزا الموسمية السنوى ياريت نطعم بيه ولادنا من اى صيدلية ..وخصوصا اللى عندهم حساسية الصدر ..وأخيرا لو ابننا او بنتنا جالها برد
ياريت تستشير الطبيب ..وماتروحش المدرسة الا لما تخف ..عشان ده بيخليهم يخفوا بسرعة ..وكمان عشان مايعدوش زمايلهم ..

ولما يرجع ولادنا لازم يتغدوا وجبة متوازنة فيها بروتين زى الفول او العدس وخضار او لحوم وفاكهة ..

الدنيا برد ..الدنيا برد ..
ربنا يخلى الورد ..