ليه دكاترة العيون لابسين نظارة؟!
بقلم- د عماد حمدى:
كتير بنسأل السؤال ده، و بنستغرب ليه دكاترة العيون بيفضلوا لابسين نظارات و هم ممكن يعملوا ليزك و يتخلصوا من النظارة للأبد؟!
و فيه ناس تعتقد إنهم ما بيعملوش عملية الليزك عشان هى عملية خطيرة أو لها أضرار على العين..
و لكن في الحقيقة في أسباب كتير تخلي معظم دكاترة العيون ما يعملوش عملية الليزك, و الأسباب دي لا تتضمن نهااااائياً خوفهم من العملية أو إن عملية الليزك عملية خطيرة و ممكن تسبب مضاعفات على المدى الطويل زي ما بعض الناس بتعتقد.
و الأسباب الحقيقية بتختلف من دكتور للتاني زي ما بتختلف بين المرضى العاديين..
في دكاترة بكل بساطة ما عندهمش مشكلة إنهم يفضلوا لابسين النظارة! و النظارة مش بتسبب لهم أي عائق في حياتهم و ممكن كمان يكونوا إتعودوا عليها و قادرين يتعايشوا معاها زي أشخاص تانية كتير, فمش بيعملوا العملية..
و في دكاترة بيعانوا من القرنية المخروطية أو أمراض في العين تمنعهم من الخضوع لعملية الليزك زيهم زي 40% من البشر!
أكيد بتسأل نفسك دلوقتي..”طيب أنا ينفع أعمل عملية الليزك و لا لأ؟“
و الإجابة على السؤال ده مش بالسهولة اللي ممكن تكون متوقعها لأن عشان تعرف إذا كنت من ال 60% من الناس اللي تنفع لهم عملية الليزك و لا لأ, مهم تخضع لفحص شامل للعين, و فحص القرنية للتعرف على سُمكها و قوتها و قدرتها على تحمل ضغط الليزر. و الدكتور بيقدر يحدد بعد إطلاعه على نتائج الفحوصات دي إذا كانت عملية الليزك هتكون مناسبة ليك و الا لأ.
و بننصح بالتعامل مع أطباء عيون واثقين فيهم لأن للأسف في أطباء بيستخدموا عملية الليزك كتجارة و بيوافقوا إنهم يعملوها لأي شخص حتى لو كان مش محتاجها.
