اهم الأخبارمقالات

حكاية الاعتداء على المستشفيات!

بقلم-د.محمود عبد المجيد:

حكاية الاعتداء على المستشفيات حكاية قديمة ومتكررة ولكن ماالسبب فى ذلك ولماذا يعتدى بعض المرضى او اقاربهم على الأطباء والتمريض ويكسروا المستشفيات والرعايات المركزة ؟!

فيه أسباب كتير منها ..

إنهم فاهمين إن القصور فى الخدمة الصحية سببها الطبيب أو الممرضة أو المستشفى ..
وخصوصا لما يكون محتاج يدخل المستشفى أو الرعاية المركزة ويقولوله إن مافيش سرير !!

ولإنه ممكن يكون لف على مستشفيات كثيرة وداخ وطلع عينه ولان العيان اللى معاه ممكن تكون حالته تدهورت بعد اللف ده

ولإنه مايعرفش الطبيب ولا سمع عن أخلاقه وأدبه وعلمه ..

ولإنه ماعندوش ثقة فى أى مسؤول بسبب الكدب اللى سمعه وشافه من المسئولين على مدى سنين طويلة..

ولإنه عارف إن الواسطة هى وسيلته عشان ياخد حقه سواء فى التموين أو الشرطة أو الرخصة أو أى مصلحة ..
ولإنه فى الأحوال السابقة بيقدر يصبر أو بيخاف إنه ياخد حقه بإيده ..
لكن فى ظروف إحتياجه لنجدة طبية لأى حد عزيز عنده فمابيصبرش وما بيسكتش .. وبيستغل بعض أهالى المريض ضعف الناس اللى بيقدموله الخدمة الطبية لانهم مش بلطجية  ..مجرد طبيب او طبيبة او ممرضة من غير أمن ولا حراسة ..فبيعتدى عليهم سواء انتقاما او ارهابا على أمل إنه ياخد حقه ..

مفهوم طبعا إنى مش بابرر الجريمة دى ..

لكن أنا زى المحامى اللى بيحاول يشرح ظروف جريمة قتل دفاع عن الشرف أو سرقة جعان لرغيف عيش عشان يسد جوعه

لكن ده مايمنعش توقيع العقوبة على الجانى ولا تسمية الجريمة باسمها ..

ييجى بقى قلة من الأطباء يعمموا ويعتبروا ان كل المرضى معتدين وان كلهم بلطجية وكلهم مايستاهلوش الخدمة الطبية ولا الرحمة ..وانهم هما المسؤولين عن مرتباتهم الهزيلة وظروف عملهم السيئة وحتى مسؤولين عن مرضهم ( لانهم بيدخنوا او مدمنين ) !!

مش واخدين بالهم ان فيه جهة وحيدة هى المسؤولة سواء عن سوء أحوال الأطباء أوالمستشفيات ..
أو جهل أوإدمان أوبلطجة بعض المرضى واللى معاهم ..

والجهة دى هى اللى بتضربنا ببعض عشان مانعرفش المسؤول الحقيقى ..

ولما يكون المريض مش متعلم والطبيب متعلم ..يبقى مين فينا اللى مالوش عذر فى تصرفه ؟!!

الرابط المختصر -صحتك 24:
الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق