فيروس كورونا .. اين المشكلة؟

فيروس كورونا المستجد، أعراضه هي تماماً أعراض البرد العادى ، زكام أو رشح ، احتقان حلق ، حراره .
ولو اتطور لالتهاب رئوى يزيد معاه ضيق نفس ونهجان ،بالضبط زيه زى الانفلونزا .

إذن اين المشكله  ؟

بعيداً عن تعقيدات أنواعه المختلفه فببساطه شديده وعشان فيروس جديد وجهاز المناعه عندنا مش متعود على وجوده فمضاعفاته ووفياته أكتر ، بالذات فى كبار السن والأطفال ومرضى نقص المناعه .
انتشاره زى أى انتشار فيروس بيسبب البرد ؛ الهواء الملوث بالفيروس ، الإفرازات التنفسيه .

صلب الموضوع ؛ نحمى نفسنا ازاى منه بالذات بعد ما وصل مصر ؟

الخطوات اللى هقولها دى شديدة الأهمية ، رغم بساطتها ، وهيا منقوله نصاً ( بتصرف بسيط) من منظمة الصحة العالميه وبالتحديد للوقاية من كورونا :

1. لكى نحمى نفسنا : علينا بغسل الأيدى بالماء والصابون بشكل متكرر إذا كانت متسخه بشكل واضح ، أو فرك الأيدى بمادة تحتوى على كحول ( سائل/ سبراى ). الكحول والصابون يقتل الفيروس قطعاً . بالذات بعد التعامل مع أشخاص مصابين بالبرد .
( ازازة كحول سبراى أو سائل صغيرة ، و كل فتره أو بعد السلام -لو مضطرين نسلم يعنى – نغسل إيدينا ، مش صعب والله )

2. كيف نحمى أنفسنا : البعد بمسافة متر /٣ أقدام عن أى شخص بشكل عام وخاصة لو مصاب بالبرد أو الكحة أو العطس .

3. كيف نحمى غيرنا ونمنع انتشار العدوى : علم طفلك و نفذ الآتى : أول ما تعطس أو تكحّ ، فوراّ فى منديل ، أو تغطى وشك بساعدك ، ده عيمنع انتشار الفيروس فى الجو أو عدوى غيرك وبلاش تعطس فى إيدك عشان ماتنقلش الرذاذ – حتى لو برد عادى- أثناء التعامل مع السلام و الأكر والأبواب والكراسي وكل ما تلميه ويلمسه حد بعدك، للناس السليمه .

مننساش برضه بعد ما نعطس نفرك إيدينا بكحول أو نغسل بماء وصابون لو فيها إفرازات.

4. إمتى نلبس القناع Mask 😷 ؟

الحقيقه مش مطلوب إلا لو حضرتك بتعطس أو بتكحّ عشان تحمى غيرك ، و لو بتتعامل مع حد بيعطس أو بيكحّ بشكل متكرر . كمان فى الأماكن شديدة الزحام زى المطارات والأسواق المتكدسه و بعض وسائل النقل العام و بالمناسبه القناع ليه شروط ان ميكونش فيه فجوات يكون لازق على الأنف و الفم والوجه و تغسل إيدك بكحول أى مياه وصابون قبل ما تلبسه ولما تقلعه متلمسش الجزء الخارجى لإنه ملوث تقلعه من الداخل وترميه فى سله مقفوله .
( الفيديو اول كومنت )
رأى شخصى ؛ بمبدأ نص العمى ولا العمى كله ، لو عالأقل ولادنا وافقو يلبسوه فى المدرسه على أساس يحميهم من العطس المباشر والكحة المباشره من زمايلهم ، أظن ده أحسن من إن وشهم يكون مُعرّض لعطسه مباشره وانتو عارفين عيالنا مبيتوصوش والله

سؤال أخير مهم جداً :

نودى عيالنا المدرسه ولا يغيبوا ؟

طبعاً نوديهم ، وننبه عليهم ( لازم يساعدنا فى التنبيه لأولياء الأمور و إدارة المدرسه والمدرسين بشكل خاص ) يبعدوا عن أى طفل بيكح ويعطس ويبلغو الميس تاخد بالها وتعزله أو يلبس ماسك لغاية ما ولى أمره يستلمه ، وننبه عليهم يكحو ويعطسوا فى الساعد ، كمان نشترى ازازة كحول سبراى بسيطه الطفل يفرك إيده بيها كل فتره خاصة بعد اللعب والسلام والتعامل مع طفل عنده برد ، ننبه عليهم بلاش حكه فى الأنف ونستخدم المنديل ، بلاش بصق فى الشارع ونستخدم المنديل .
إنما مش هيغيبو إلا لو انتشر فعلاً على نطاق واسع ، مش حاله أو حالتين يعملوا فزع ياخوانا استعينوا بالله وخدوا بالأسباب .

وربنا سبحانه وحده الحافظ يحفظهم بحفظه “فالله خيرٌ حافظاً وهو أرحمُ الراحمين ”

التعليمات دى على بساطتها .. هيا الوقاية الوحيده من فيروس الله أعلم مداه إيه وهيكمل ازاى الله الحافظ ، مع العلم لسه مفيش علاج ولا لقاح ولا مصل ، فيا ريت البوست ده يلف الفيس وكل الناس تستفيد منه

د.أحمد الخطيب أخصائي طب الأطفال وحديثي الولادة