هل الكحة مُعدية ؟!

بقلم-د.محمود عبد المجيد:

طبعا 99% من الكحة معُدية ..
ويتبقى  1% فقط من كحة الحساسية وتليفات الرئتين ..مش معُدية مؤقتا بس ممكن تبقى معُدية لو حصل التهاب حاد فيروسى او بكتيرى ..او غيره ..

الكحة بتعدى لان الجراثيم اللى سببت المرض والكحة ..بتخرج مع رزاز الكحة وينتشر فى الجو ..وبعضها بيستنشقه المخالطين القريبين للمريض مباشرة ..وبعض الرزاز بيتساقط على الأرض وعلى الأشياء القريبة زى الترابيزات ..وبعضها بيلوث ايد المريض اللى بيمسك بيها المقابض وغيرها ..ولما تنشف ممكن تتطاير مع تيار الهوا ويستنشقها المخالطين برضه ..او يلمسهوها بايديهم وتتنقل لهم برضه عند لمس الفم أو الأنف ..
ويصاب المخالط بالعدوى وممكن يبقى مريض لو أعداد الجراثيم كانت كبيرة ..وكانت مناعته ضعيفة لأى سبب من اسباب نقص المناعة زى فى السن الصغير او المسنين أو اللى عندهم سكر او روماتويد او اللى بياخدوا ادوية تقلل المناعة زى الكورتيزون او ادوية الأورام ..

عشان كده الوقاية خير من العلاج ..
واهم طرق الوقاية هى التهوية ووضع اليد او اى منديل ورقى اثناء الكحة ( والتخلص منه بعد كده فى صناديق القمامة ) .. وغسيل الايدين باستمرار بالماء والصابون ..وتنظيف الأسطح والأرضيات ايضاً بالماء والصابون او بأى مطهر ..كمان لازم نعالج الكحة بسرعة عند الاطباء المختصين ..ونمنع اولانا من الذهاب للمدرسة لو بيكحوا عشان مايعدوش زمايلهم ..
وطبعا تطعيم الأنفلونزا الموسمية السنوى ( اللى لسه مانزلش !!) ضرورى جدا  للناس اللى مناعتهم ضعيفة ..