الدكتور محمود عبد المجيد يكتب.. مركز بصيرة أم وزارة الصحة

مركز بصيرة مركز مستقل مش إخوان ولا ممول من قطر ولا قاعد فى تركيا، وتقريره اللى مبنى على بحث عن طريق الموبايل على عينة ممثلة (زى مابيقولوا )، بيأكد اللى كلنا كنا حاسين بيه واللى كنا بنقوله ان أعداد مرضى الكورونا أكتر بكتير من اللى بتعلنه وأعلنته وزارة الصحة.

آخر عدد امبارح الاتنين 23 – 6 – 2020، كان حوالى ٥٧ الف مصاب !! يعنى عُشْرْ ١٠/١ العدد اللى توقعه مركز بصيرة واللى كان ٦١٦ الف مصاب !!! ودى كارثة بكل معنى الكلمة فى العالم المتقدم الديمقراطى العدد المعلن بيبقى أقل من العدد الحقيقى لكن مش بالفرق ده يعنى يبقى فيه فرق بسيط ٥% مثلا مش ٩٠ % !!!

ومعنى الكلام ده ان عدد المسحات او الاختبارات كان قليل جدا، وان المستشفيات المكتظة بالعدد الرسمى كانت حاتنهار تماما لو اتشخصت واتحول جزء منها على الاقل ٩٠ الف مصاب ( نسبة ١٥%من اجمالى المصابين )، وان عدد الحالات اللى كانت حتحتاج رعاية مركزة يبلغ ١٢ الف حالة ( ٥% من الحالات المصابة ) وطبعا الوفيات حاتبقى اكتر بكتير ناس ماتشخصتش واتعالجت فى البيت وخفت او ماتت، ياريت تكون الإحصائية اللى افترضها مركز بصيرة .
ياريت مجلس الوزراء يعتمد على تقربر مركز بصيرة في قراراته الخاصة برفع الحظر وعودة السياحة والانشطة عموما ومايعتمدش على بيانات وزارة الصحة الغير حقيقية والغير واقعية.