التغيير اللى حصل فى الدماغ!
بقلم –د .عبد الرحمن حماد:
التغيير اللي حصل مش بس في شكل الدماغ بتاعت المخدرات..!
للاسف حصل تغيير كمان في اتجاه كتير من المدمنين بأنهم يتاجروا بالمخدرات..!
وان المخدرات تكون وسيلتهم انهم يقبوا من على وش الارض..!
حد من الشباب -طالب في كلية هندسة- والولد دماغه نضيفة جدا،
الشاب ساخط على أسرته وساخط على حياته،
ومش عاجبه الظروف اللي فيها،
وللاسف عاجبه موضوع تجارة المخدرات،
وشايف انها مكسب سريع،
وانك تقدر تعمل كل اللي انت عايزه..!
فلوس..بنات..علاقات..قوة..كل حاجة..!
وشايف كمان ان المخاطر او ال risk يستحق المخاطرة..!
بقوله انت هدفك ايه في الحياه وايه المعنى اللي انت عايش ليه..
بيقولي انا جاي أتمتع واتبسط..!
بقوله واحنا بنتمتع ونتبسط -وكمان من غير ما نأذي نفسنا–
او انك تقضى حياتك كلها في السجن..!
او تموت وانت بتنقل مخدرات،
فضلا عن الهلاوس اللي بتحصل ليك من المخدرات..!
بقوله انت بتفقد عقلك وانت بتضرب..!
الشاب كل ما يرجع ياخد مخدرات،
بيحصل له هلاوس وهياج وعنف..!
بيقولي انا لما يكون معايا فلوس،
حضرب مخدرات نضيفه.!
بقوله حتى المخدرات النضيفه بتعمل الأعراض دي،
فساعتها لا حتتبسط بالمخدرات ولا بالفلوس اللي معاك..!
بيقولي حتعالج في احسن المصحات بالفلوس اللي معايا من المخدرات.!!
للحقيقة اخدت وقت في الكلام معاه،
وكنت مهتم بالكلام على المعنى والهدف من الحياه،
ومهتم إننا نخلق معنى لحياتنا،
غير انك جاي تتمتع وتتبسط..!
الشاب بيقولي انا عارف تاجر مخدرات واتحبس أسبوع
وخرج عشان علاقاته وفلوسه وبيقعد مع ناس كبيره..!!
بقوله وانا اعرف ناس اتحبست وبيقعدوا ٥٠ واحد في زنانة ضيقة نصيب الواحد اقل من نص متر،
واعرف ناس اتجننت وانتحرت..!
اخدت وقت كتير معاه واعتقد لسه قدامنا وقت..!
اتفقنا في الاخر اننا عندنا امتحان بعد أسبوعين محتاجين نعديه
ومش حناخد مخدرات في الاسبوعين دول عشان محتاجين نحضر ونروح الكلية والمخدرات بتأثر على التركيز بتاعنا،
ونرجع نكمل الخناقة بتاعتنا..!
خصوصا انه هو اتفق مع صاحب ليه طالب معاه في الكلية،
يعملوا الطلعة دي بعد امتحانات الفاينل..!
احنا نعرف نجيب مخدرات رخيصة،
ونعرف نسوقها كويس ونعرف نطلع فلوس كويسة من الموضوع دا..!
اعرف شباب كتيرة اتجهوا انهم يتاجروا في المخدرات،
وشفت دا في الصعيد بشكل كبير جدا،
واعرف اولاد اهاليهم ساعدوهم في تجارة المخدرات..!
عاده لما بفحص شاب بسأله دخلك يومي ولا اسبوعي ولا شهري،
ودخلك كام..!
وبتصرف كام على المخدرات ..؟
ولو دخلك مش بيكفي بتتصرف ازاي،
هدفي من السؤال اعرف اذا كان بيعمل مصلحة من المخدرات ولا لا،
بمعنى انه مش معاه فلوس،
فيروح يشتري مخدرات ليه ولأصحابه،
ويطلع المخدرات بتاعته بمصلحة من ورا صحابه،
او يشتري لصحابه او يبيع لهم،
وهو مش عارف انه بكدا ديلر صغير او مشروع تاجر مخدرات..!
للحقيقة اغلب الشباب المدمنين عملوا ” المصلحة ” دي،
في اي وقت من أوقات الضرب،
والشباب دي مش بس الفقرا،
وحتى اللي من مستوى مادي كويس بيعمل دا -للاسف–
وفِي رأي دا عامل خطورة رهيب جدا،
وبيكسر حواجز كتيرة جوا الشاب المدمن،
وبتجرأه اكتر،
خصوصا لو مشيت معاه..!!
وعملوا فلوس من ورا المخدرات..!
الموضوع فيه خطورة كبيره ومتزايدة،
وفِي حواجز كتيرة اتكسرت،
ولازم الاسر تاخد بالها منها،
خصوصا ان المراهقين وصغار السن هما اكثر فئة،
ممكن يتم استغلالهم في الموضوع دا،
او حتى هما بنفسهم ممكن يكون عندهم الحماس والاندفاع نحو دا..!
وممكن يكونوا هدف لتجار المخدرات،
وبالذات اذا كانت صحيفة الحاله الجنائية كويسة،
ومعلهوش سوابق،
وكمان لسه مش معاه بطاقة..!!
وكمان احنا كمعالجين لازم نعظم خطورة التصرف دا مع الشباب والأولاد اللي بنشوفهم،
ونقولهم إنكم مشاريع ديلر او تاجر مخدرات..!!
ونحاول انهم يتخيلوا حياتهم في السجن-لا قدر الله-ازاي..!
الدكتور عبد الرحمن حماد.. مدير مركز إنسايت للصحة النفسية وطب الإدمان
