أمومة وطفولةالأخباراهم الأخبار

الدكتورة أسماء زعفان ترد علي أبرز أسئلة الأمهات لطبيب الاطفال

تراود كل أم جديدة عدة تساؤلات عن طفلها منذ أول يوم ولادة، وكلها تتعلق  “بأحوال الطفل وما يفيد وما يضر “.
ومن خلال موقع صحتك 24 تقدم لكم الدكتورة أسماء زعفان  إجابات عن أهم هذه الأسئلة :
س.يادكتوره ابنى اتولد ضعيف جدا ووزنه اتنين كيلو ونص؟
ج. طبيعى جدا لان وزن الطفل الكامل الطبيعى من اتنين كيلو ونص لتلاته كيلو.
س. انا لسه والده وعاوزه اديله اى حاجة لحد ما اللبن عندى ينزل ؟
ج.‍ ماهو السرسوب ده اسمه لبن وكميته قليل بس مشبعه ومفيدة جدا لانه مليان مضادات حيوية طبيعة
س.طب كنت عاوزه اديله اعشاب أو رضاعة صناعى أو ينسون
ج. ممنوع
س. يادكتوره انا لبنى خفيف وعاوزه ادخل صناعى ؟
ج.مافيش حاجة اسمها لبن خفيف ولبن تقيل لانه ببساطه اكثر من ٨٠ ٪ من اللبن عموما مايه
س.يا دكتوره  أنا ابنى مازادش غير كيلو بس من ساعة لما اتولد وعمره دلوقتى شهر ؟
ج.اول اربع شهور الطبيعى أنه يزيد بس كيلو الا ربع كل شهر يعنى هو كده تمام
س. يا دكتوره  معلش ابنى مولود صدره كبير شويه وقالولى اعمليله تعصير لصدره  اعمله ؟
‍ج.️ اوعى ياماما انتى كده هتعملى خراج وصديد وبلاوى دى هرمونات أنثوية منك يعنى وبمجرد ما هتتسحب من الدم هيخف لوحده.
س. تطعيم الدرن يادكتوره بتاع كتفه حاسه أنه ملتهب اصفيه ؟
ج. ماتقربيش منه خالص ممنوع هو هيخف لوحده برضو
س. طب يادكتوره فى احمرار كده فوق جفون بنتى من الجانبين
ج.طبيعى وبيختفى لوحده
س. ابنى اليوم التانى أو التالت مش فاكره بالظبط بدأ عنيه تصفر وباباه حطه تحت لمبه نيون عشان الصفراء تنزل ؟
‍ج.الصفراء اول يوم باثولوجيه يعنى مش طبيعية وغالبا أسبابها تكسير فى الدم ودى بتحتاج حضانة لأننا بنعمل تغيير للدم أو الطفل بيتحط فى الكبسوله أو الغواصه ودى علاج ضوئى ٣٦٠ درجة يعنى من كل النواحى .. انما صفرا اليوم التانى أو التالت أو الرابع دى اسمها فسيولوجية ودى أما تحتاج حضانة بعلاج ضوئى عادى أو لو النسبة قليله هتحتاج رضاعة فقط كويسه  بانتظام كل ساعتين لمبة البيت بقى هتسخنه فقط ومش هيستفيد منها حاجة فى موضوع الصفراء .
س. يادكتوره النقط الزرقا اللى على ضهرة وعلى فخده من وراء دى حلها ايه ؟
ج. دى اسمها مونجوليان سبوت ودى طبيعية وبتروح لوحدها
س. معلش بقى يادكتوره  فى حاجة عاوزه اقول لحضرتك عليها بس مكسوفه شويه .. وانا حامل كان نفسى فى حبايتين فراولة وجوزي قالى بس ياطفسه ومارضيش يجيبهالى واهو يادكتوره زى ماحضرتك شايفه لزقت لابنى بعد ما اتولد
ج.  مش مظبوط يا ماما دى وحمه دموية وبرضو لو حضرتك اكلتى شجرة الفراولة كلها كانت هتظهر .
س. يادكتوره  التسلخات بقى حلها ايه ؟
ج.‍ لازم حضرتك تنشفى كويس لان الفطريات بتحب المايه وكمان استخدمى علي  طول كريم يحتوى علي  الزنك
س.يادكتوره  موضوع الحمام بقى يادكتور عشان احيانا بحس أنه عنده اسهال وأحيانا بحس أنه إمساك عاوزه افهم الليله دى ؟
ج.أنماط الإخراج عند حديثى الولادة مختلفه ممكن يعمل حمام بعد كل رضعه وممكن مرتين او تلاته فاليوم وممكن كل يومين او تلاته وممكن كل اسبوع
س. كل اسبووووع ياااه كتير اوى  وماستخدمش لبوس ملين ؟
ج.ممكن لو بعد ٣ أو ٤ ايام استخدم لبوس بس عشان البراز ممكن يبقى ناشف شويه فيعمل تجريح شرجى انما لو مش ناشف مش هنستخدم.
س. طب يادكتور شوفلى حل مع الخنفره لانى تعبت ؟

ج. الخنفره من علامات نضوج الطفل ودى حاجة طبيعية والطبيعى مش بيخف هنستخدم نقط ملح وغيرها من الادوية والتي تعمل علي تهدئة الخنفرة .
س.طيب والانتفاخ الرهيب ده يادكتور وبسببه زن  الطفل طول الليل والنهار ومش بينام ؟
ج.نفس الفكره بالظبط اى طفل بيتولد كامل النمو بيبقى عنده انتفاخ وخنفره واحيانا ارتجاع وكل ده طبيعى طالما الطفل بيرضع كويس ووزنه بيزيد ونفسه مش عالى وركزى ياست الكل مع كل كلمه انا قولتها لأن اى تغيير فيها فده مش طبيعى
س. يعنى كده يادكتوره الانتفاخ مش هيخف خالص ومش هياخد اى أدوية ؟
ج. بيخف متوسط ٦ شهور وبياخد أدوية للانتفاخ بس نفس الفكره لأنه طبيعى فممكن يخف شويه انما مش بيختفى
س.والترجيع بقى اللى شغال معاه من وقت الولاده وكل ما يرضع رضعه يرجعها كلها وبيرجع من بقه ومناخيره تقريبا كده كل الرضاعة بيرجعها مع العلم بيرضع كويس ونفسه بيزيد ؟
ج.كويس ياماما أما هبدأ من اللى حضرتك انتهيتى بيه أنه طالما بيرضع كويس ووزنه بيزيد فده برضو طبيعى
س. طب يادكتوره  انا برضعه طبيعى وسمعت كلمة انى لازم ارضعه كل ساعتين وانظم الرضاعة ؟
ج. مافيش حاجة اسمها تنظيم رضاعة مع الطبيعى والطفلة يرضع وقت اللزوم .
س .ابنى بقى يادكتور عينه الشمال من وقت الولاده هو ما شاء الله عنده شهر ومن وقتها وعينه بتعمل إفرازات جامده اوى وبتحمر ؟
‍ ج.ده اسمه انسداد فى القناة الدمعية و ٩٠٪ من الأطفال بتخف لوحدها والعلاج كمادات ماء دافية ومراجعة الطبيب وقت الاحمرار والالتهاب وال ١٠٪ اللى مش بيخفوا بيتعملهم عملية تسليك للقناة الدمعية عند عمر عام ونصف .
س. معلش بقى يا دكتورة بتقل عليكي كنت عاوزه اعرف من حضرتك قصة الفيدروب وجرعته ومن سن كام وأدى كالسيوم امتى ؟

ج.الفيدروب اسمه العلمى فيتامين د جرعته ٤٠٠ وحده يوميا وكل نقطة من الفيدروب فيها ١٠٠ وحده فأنا محتاج ٤ نقط يومياً تحت سنة و ٦ نقط فوق سنة ودى جرعة وقائيه .. أما بالنسبة للكالسيوم فممنوع الا لو عملنا تحليل كالسيوم وظهرلنا أنه فى نقص وقتها هنصرف كالسيوم غير كده لأ لأنه بيترسب في الجسم وتتكون حصوات
س. طب والحديد ؟
ج. ده على سن ٤ إلى ٦ شهور وبنديه برضو كجرعة وقائيه عشان نمنع الانيميا ونقص الحديد.
س. يادكتوره ابنى عنده فتقين واحد سره وبلبسله حزام والتانى إربى عاوزه اعرف بقى علاجهم ايه؟
ج.  فتق السره مشهور جدا فى كتير من الأطفال وسببه ضعف عضلات البطن ومش بنستعمل حزام سره ممنوع وهيختفي عند سن سنتين ل خمس سنوات ، لو فضل زي ما هو هيحتاج تدخل جراحي ، انما الفتق الإربى فيحتاج لجراحة من البداية ولا ننتظر حتي لا تحدث مضاعفات مثل الانسداد المعوي .
س. يادكتورة حماتي منذ ولادة  ابنى وبتلف حوالين  بطنه وظهره بحاجة كده شبه الملاءه بحجة أنها بتسند ظهره ايه رأى حضرتك ؟
ج. ممنوووووع ده بيخنق الطفل اكتر ومالوش فايده جهاز الطفل العصبى بيكبر ويكتمل ببطء وعلى مراحل يعنى مش هتفيده.
س. يادكتوره الاستحمام للطفل وقت الشتاء والصيف ؟
ج .الشتاء مرة كل ثلاثة ايام و الصيف مرة يوميا  .
د.اسماء كمال زعفان
أخصائي طب الأطفال وحديثي الولادة بمستشفيات جامعة القاهرة

الرابط المختصر -صحتك 24:
الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق