مقالات

أى حاجة!!

بقلم- د.محمود عبد المجيد:

عيادة أمراض النساء فى مستشفى شبراخيت بمحافظة البحيرة ..
على بعضها من الزحمة ..واصوات عالية واللى بيزعق اعلى بيكشف الاول ..
وطبيب العيادة نائب جديد لسه مخلص نوبتشية 24 ساعة عمل ولادتين طبيعيين واتنين قيصرية ..ومانامش من ساعتها ..
مريضة: جسمى كله بيوجعنى بعد إنقطاع الدورة الشهرية ..
طبيب العيادة : أكتبلك إيه ؟
المريضة : أى حاجة
طبيب أمراض النسا ..كتب الروشتة لصيدلية العيادة ..
فوجئت المريضة إنه كاتب كلمة
(أى حاجة ) فى الروشتة !!!
راحت مصورة الروشتة واشتكت الطبيب اللى اتحول للتحقيق !!
طبعا ده غلط وسوء تصرف من الطبيب ..لإن مع إنى مش إخصائى نسا ..لازم الطبيب اى طبيب يحترم شكوى أى مريض ويحاول يستفهم منه عن طبيعة شكواه ..وانا عارف ان فيه مرضى كتير مابيعرفوش يعبروا عن شكوتهم ..وده عادى ..حتى أنا ساعات باحس انى تعبان ومش عارف فيا إيه ..
وغلط وسوء تصرف لانى عارف بخبرتى المحدودة فى امراض النسا ان فيه اعراض مابتبقاش مفهومة ولا محددة وده بسبب التغير الهرمونى بعد انقطاع الدورة ..
والمفروض انه يكشف عليها كويس ويعمل لها تحاليل ويكتبلها مسكن لحد ماتظهر نتيجة التحاليل ..
ده المفروض يتعمل من وجهة النظر الطبية ..
لكن تعال معايا نحلل ونفسر (مش نبرر) المشكلة ..

لو ده حصل فى دولة عندها نظام طبى محترم ..
عيادة الممارس العام فى مستشفى ..مكان نظيف ..غرفة الطبيب جيدة الترتيب والنظام والنظافة ..عدد عشر ملفات من ملفات المرضى اللى حاجزين دورهم قبلها بوقت كافى ومدة العيادة تلات ساعات ..يعنى كل مريض ليه حوالى عشرين دقيقة للكشف ..
المريضة فى دورها : جسمى كله بيوجعنى ( بالانجليزى طبعا )
الطبيب ( اللى بيشتغل ممارس بس ولساعات محددة وبيكشف على عدد محدد كل يوم )بيسألها اسئلة كتير وبيحدد تقريبا مكان الألم ..
وبيكشف عليها كويس.. وبيكتب لها تحاليل ..
وعلاج مسكن مؤقت ..
وبتروح بعد كده تعمل التحاليل وتصرف المسكن ..
وتيجى بعد ظهور نتيجة التحاليل للممارس العام ..
اللى بيلاقى انه مش عارف يشخص حالتها فيحولها للإخصائى فى نفس اليوم اللى عنده مرضى اقل وخبرة اكبر ..
لكن بالرغم من كده بيحولها للإستشارى اللى تقريبا ماعندوش مرضى وبيستمر فى عمل تحاليل وفحوص لغاية مايوصل للتشخيص السليم والعلاج ..
شفت بقى العيب والمشكلة فى مين ؟؟
العيب مش فى المريضة ولا الطبيب ..
العيب فى النظام ..

الدكتور محمود عبد المجيد-استشارى أمراض الصدر والحساسية

الرابط المختصر -صحتك 24:
الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
%d مدونون معجبون بهذه: