كتب هشام الهلوتى
استكملت هيئة الإسعاف المصرية دورها الانسانى مع والد الطفل محمد رجب، اللي خطف قلوب كل المصريين ببراءته وهدوئه وخوفه على والده.
النهاردة والد محمد وصل بيته بالسلامة بصحبة رجال الإسعاف المصري.
وقالت هيئة الإسعاف في بيان لها: محمد بالنسبة لينا مش ترند أو مجرد موقف عابر، محمد لمس قلب كل مسعف مصري، محمد أحيا داخل كل مسعف ذكرياته مع مئات القصص الإنسانية اللي مر بيها بدون ما تظهر للنور.
محمد بالنسبة لنا كان برهان ودليل على أن صميم عمل المسعف المصري ضميره وإنسانيته، برهان حي على أن منظومة الإسعاف المصري بقت صمام أمان لشعب مصر العظيم.
محمد هيفضل حاضر دائما في ذاكرة الإسعاف المصري، ومكالمته هتبقى مادة تعليمية لكل أطفال المدارس اللي هنروح مدارسهم علشان نعلمهم الإسعافات الأولية، علشان نعرفهم إن الإسعاف حيـــــاة.
